- Bi puntuen bidez, diskurtsoa eten egiten da, segidan datorrenari nolabaiteko ataria emanez.
- Gehienetan, bi puntuen atzetik ez da erabiltzen lokailurik. Izan ere, aurrekoaren azalpen, ondorio edo iruzkintzat hartzen da, lokailuak esplizitatu gabe ere.
- Teorian, komunztadura egitea aukerakoa da, baina komunztatu gabekoak oso arrotzak gertatzen dira batzuetan: batez ere, sintagma hutsetik urrundu eta esaldira gehiago hurbiltzen garenean.

Ezusterik ezean, David Lopezek eta Enrique Corralesek beteko dituzte atzealdeko bi hegalak: Lopez eskuinean, eta Corrales ezkerrean. [?]

Ezusterik ezean, David Lopezek eta Enrique Corralesek beteko dituzte atzealdeko bi hegalak: Lopezek eskuinean, eta Corralesek ezkerrean.

- Behin baino gehiagotan erabil ditzakegu bi puntuak segidan, tartean punturik izan gabe. Dena dela, oso kontuz ibili behar da, haria gehiegi korapila ez dadin.

Hauxe izan zen gakoa: Alderdi Popularrak baldintza batekin eman zizkion bere botoak CiUri: Estatutua ez aldatzea.

Ez da, jakina, aliritzira egindako hautua: liburua osatzen duten bost ipuinetan «ardatz» dira, Karmele Jaio idazle eta kazetariaren ustez, izenburua osatzen duten hiru hitzetatik bi: bihotza eta gosea.

- Bi puntuen ondotik, zuriunea uzten da beti.

• Noiz erabiltzen diren

- Azalpena, kausa, ondorioa edo aurrekoaren laburpen modukoa sartzeko erabiltzen dira bi puntuak.
Puntu eta komak baino ere agerianago uzten dute lotura semantikoa.

Beste bi egitasmoak ez daude oraindik onartuta, ezta guztiz erabakita ere, baina bai nahiko pentsatuak: Zorion perfektua aurten filmatzen hasteko asmoa du Amigok, eta Bihotz bi datorren urtean filmatu nahi du.

Bi sail nagusi ditu erakusketak: batean, egileak Balear uharteetan eta Parisen pintatutako 22 olio pintura daude, zuriaz eta beltzaz aparteko kolore askorik gabekoak; bestean, Malin 2004ko abenduan eta 2005eko urtarrilean egindako marrazki koloretsuak eta brontzezko bost eskultura.

- Enumerazioak irekitzeko edo ixteko modu bat dira.

Einsteinen teoria eta hipotesi asko egiaztatu egin dira, eta haren teorietan oinarritutako hainbat tresna ezinbestekoak dira gaur egun: kamera digitalak, laser izpiak, GPS sistema, unibertsoaren garapenaren teoria, zelula fotoelektrikoak…

Kamera digitalak, laser izpiak, GPS sistema, unibertsoaren garapenaren teoria, zelula fotoelektrikoak… Einsteinen teoria eta hipotesi asko egiaztatu egin dira, eta haren teorietan oinarritutako hainbat tresna ezinbestekoak dira gaur egun.

- Etsenplu modukoak sartzeko ere erabiltzen dira bi puntuak.

Columbia disketxeak Miles Davis jazz musikariaren hainbat disko berrargitaratuko ditu datozen hilabeteotan: Seven Steps to Heaven, besteak beste.

- Aipuak eta adierazpenak txertatzeko, batez ere estilo zuzenean, askotan baliatzen dira.
Estilo zuzenean ari bagara, bi puntuen ondoko lehen hitza letra larriz idazten da.

Hedabideek Afrikarekin duten jokabideari oso kritikagarri deritzo Mankellek: «Europar guztiok oso ondo dakigu Afrikan nola hiltzen diren, baina Europan inor gutxik daki Afrikan nola bizi diren».

- Katafora moduren bat erabiltzen denean (erakuslea, izenordea…), esaldiak lotzeko modu bat dira.

Oso gauza argia esango dut: gure lurraldean ez dago ia nekazaritzarik, abeltzaintzarik ere ez kasik, eta jaten dugun guztia inportatzen dugu ia-ia.

Telebistak ondorio hau ekarri du: jendeak uste du bertsotan egiten dakien bakarra bertsolaria dela.

- Ordua zenbakiz idazten denean, bi puntuak jarri behar dira.

Dirudienez, 23:00etan etorriko dira.

- Puntu eta komaren ondotik, zuriunea uzten da beti.

• Noiz erabiltzen den
  - Esaldien artean esanahi lotura estua dagoela adierazten du puntu eta komak.
  Horrelakoetan, puntu eta koma erabiltzen da esaldiak bereizteko, eta ez puntua. Beraz, testuetan puntua ez ezik puntu eta koma ere erabiliz gero, sotilago adieraz daitezke esaldien arteko lotura semantikoak.
  Gasteizko gizonik aberatsena zen; lurrak, etxeak eta errotak zituen.

Lotura logikoa esplizitatu nahi izanez gero —kausa, ondorioa, aurkaritza…—, lokailuak eta bestelako diskurtso antolatzaileak erabili beharko ditugu.

Aimarrek Peñagarikano izango du lagun; Asierrek, berriz, Ruben Beloki.

Batez ere, eleberriak eta ipuinak irakurtzen ditut; zuk, aldiz, sekula ez duzu nobelarik irakurri.

Nik uste dut oparitarako erosketa asko egiten dela hemen; hori ikusi dut nik, behintzat.

- Enumerazioetan, normalean komaz bereizten diren elementuak puntu eta komaz bereizten dira, baldin eta barrenean komak badituzte.

Bertan izan ziren Elizabeth Schuhmacher, Errauste Planten Aldeko Elkarteko burua; Andrea Floret, Ingurumen Saileko biologoa; Jesus Etxebarri, Gipuzkoako Aldundiko teknikaria; eta Asier Garmendia, Natura Babesteko Planaren egilea.

Kristautasunean bezala, hinduismoan ere trinitatearen irudia agertzen da: Vishnu, munduaren ordenaren bermatzailea; Shiva, suntsitzaile beldurgarria; eta Brahma, unibertsoaren sortzailea.

- Laburpen moduko batzuetan ere puntu eta koma baliatzen da. Argibide gisakoak izan ohi dira, esaldi bukaeran idatziak.

Bizipen horiek sentimendu bat sortzen dute, eta sentimendu hori hitz bilakatzen da; kantu, azken finean.

Gainerako kasuetan, ordea, komeni da marra luzeen artean jartzea, tokiz aldatzea edo beste esaldi bat egitea.
Hobetzekoa: Europako atletek, 35 eta 95 urte artekoak, proba guztietan hartuko dute parte Beteranoen Munduko Txapelketan.
Hobea: Europako atletek —35 eta 95 urte artekoak [denak/guztiak...]— proba guztietan hartuko dute parte Beteranoen Munduko Txapelketan.
Hobea: Europako atletek proba guztietan hartuko dute parte Beteranoen Munduko Txapelketan. Guztiak 35 eta 95 urte artekoak dira.

• Menpeko perpaus baten barrenean, hobe da komarik gabeko formak erabiltzea.
  Hobetzekoa: Dick Cheneyk, AEBetako presidenteordeak, esan duenez, ez dago ados batzordeko buruekin.
  Hobea: Dick Cheney AEBetako presidenteordeak esan duenez, ez dago ados batzordeko buruekin.
  Hobea: AEBetako presidenteorde Dick Cheneyk esan duenez, ez dago ados batzordeko buruekin.

Beste aukera bat ere badago: menpekoa esaldi nagusi bihurtzea.
Dick Cheneyk, AEBetako presidenteordeak, esan du ez dagoela ados batzordeko buruekin.

• Noren eta nongo kasuekin, komeni da komarik gabeko formak erabiltzea, eten handiegia sortzen baitu koma tarteak:
  Hobetzekoa: Asko gustatu zaio Steven Cohenen, Bill Clintonen kolaboratzailearen, ideia.
  Hobea: Asko gustatu zaio Bill Clintonen kolaboratzaile Steven Cohenen ideia.
  Hobea: Asko gustatu zaio Steven Cohenen ideia. Bill Clintonen kolaboratzaile da Cohen.

• Aposizioak esaldia zamatzen badu, hobe da aditzaren ondora eramatea.
  Hobetzekoa: Juventuseko entrenatzaileak, gainera, Roberto Padini, taldeko jokalaririk zaharrena, beste postu batean jarri zuen.
  Hobea: Juventuseko entrenatzaileak, gainera, beste postu batean jarri zuen Roberto Padini, taldeko jokalaririk zaharrena.

Hobetzekoa: Haserre agertu zen atzo Iñigo Urkullu Eusko Legebiltzarreko Giza Eskubideen Batzordeko presidentea Biktimen Ponentzia iraunkorraren egitekoaren inguruan PPk eta PSE-EEk sortutako polemikagatik.
Hobea: Haserre agertu zen atzo Iñigo Urkullu, Eusko Legebiltzarreko Giza Eskubideen Batzordeko presidentea, Biktimen Ponentzia iraunkorraren egitekoaren inguruan PPk eta PSE-EEk sortutako polemikagatik.

• Koma tarteko aposizioetan, berdin deklinatzen dira bi osagaiak.
  Dick Cheneyk, AEBetako presidenteordeak, ez du deus esan.
  Dick Cheney, AEBetako presidenteordea, ez dago ados batzordeko buruekin.
• Horrelako aposizioetan ere jarri behar izanez gero, aurreneko elementuaren ondotik idazten da.

Hobetzekoa: Zuzenduko duen orkestra ez ezik, emango duten obra, Fidelio ere, ondo ezagutzen du Gomez Martinezek.
Hobea: Zuzenduko duen orkestra ez ezik, emango duten obra ere, Fidelio, ondo ezagutzen du Gomez Martinezek.

2. Komarik gabea.

• Aposizioa komarik gabe idatziz gero, azken osagaia bakarrik deklinatzen da.
  Dick Cheney AEBetako presidenteordeak ez du deus esan.
  Dick Cheney AEBetako presidenteordea ez dago ados batzordeko buruekin.
• Bi izen berezi segidan doazenean, ez da komeni komarik gabeko aposizioa erabiltzea:

Hobetzekoa: Jackson Bushen aholkulariak argi eta garbi hitz egin du.
Hobea: Jacksonek, Bushen aholkulariak, argi eta garbi hitz egin du.
Hobea: Bushen aholkulari Jacksonek argi eta garbi hitz egin du.

3. Molde klasikoa:

• Horrelakoetan, azken osagaia bakarrik deklinatzen da, eta ez da komarik jartzen.
  AEBetako presidenteorde Dick Cheneyk ez du deus esan.
  AEBetako presidenteorde Dick Cheney ez dago ados batzordeko buruekin.

Gaizki:

• Zinta: Munduko errefuxiatuen gaineko txostena
• Titulua: NBEk dio huts egin dutela errefuxiatuak babesteko neurriek
• Azpititulua: Gobernuek errefuxiatuei jartzen dizkieten traba burokratiko eta politikoez ohartarazi dute txostenean
• Testu hasiera: Errefuxiatuen kopuruak behera egin duela dio NBEk, gobernuek asiloa ukatu eta kriminalizatu egiten dituztelako.