Zentik

Ignacio Escolar kazetariaren blogean ikusi dut bideoa eta komentarioak. Biharamuneko pilulaz ari dira.

Hainbatetan esan didate Telemadrid dagoen telebista okerrenetarikoa dela, ikusiz gero harrituta geldituko nintzakeela… Zoritxarrez ez dut inoiz ikusteko eta aztertzeko aukerarik izan. Dena den, bideoan ikusten den modukoa bada, nahikoa ikusi dut: objektiboa, neutrala eta plurala, bai horixe!

Banekien PSOEren kontra etengabean aritzen dela, politika duela ardatz… Baina hau uste nuena baino okerragoa da. Denok dakigu telebistek, publikoak izanik ere, ildo ideologiko konkretua jarraitzen dutela: boterean dagoenarena. Baina, askotan, itxurak gordetzen ahalegintzen dira. Esperanza Agirre eta konpainia ez dira horretan saiatu ere egiten, ordea. Eta okerrena zera da, normaltzat dutela eta Telemadrid plurala dela diotela. Niretzako Telemadrid, PPren bozgorailu politikoa besterik ez da.

Baina gizajoak hori ikusi behar dutenak. Nik ez nuke nahi nire diruarekin horrelakorik egitea, baina gehiago preokupatzen nau hori ikusten dutenek sinistu egiten dutela jakiteak, eta manipulatu egiten dituztela ohartzeak. Batzuek, noski, entzun nahi dutena jasotzeko jarriko dute telebista hori. Beste asko, ordea, ez dira ohartuko. Ea euren ezjakintasunetik esnatzen diren edo norbaitek esnatzen dituen.

Informazio gehiago: salvemostelemadrid

Popularity: 16% [?]

Aspaldiko egunotan hautsak harrotzen ari dira Iñaki Lopez Pasalo programaren aurkezlearen komentarioak. Kuban homosexualak kartzelatzen omen dituzte eta ez dakit zenbat gauza gehiago. Ez da lehenengo aldia ETBn horrelakoak esaten direnik. Informatiboetan ere esan izan dute ez dagoela hauteskunderik, edota egiten direnetan alderdi bakarra aurkeztu daitekeela, gobernukoa. (Hemen dago gertatutakoa: hasierako bideoa, zuzentzeko eskaera, zuzenketa…).

Ez da lehenengo aldia Cubainformacionek horren gainean ohartarazi duela. Nik ere ez dut Kuba ezagutzen, baina hitz egin baino lehen zertaz ari naizen ziurtatzen ahalegintzen naiz. Alegia, esango dudana egia dela jakiten. Kazetari askori falta zaien/zaigun kontua da hori oraindik. Are gehiago Kubari dagokionean, denok ezagutzen dugu zer gertatzen den bertan, eta ez da inor hara joan. Topikoak ez dira sartzen kazetariaren lanean. Horren kontra egin behar dugu. Kasu honetan, laguntza handi bat ere badugu, Conjura contra Cuba Pascual Serranoren liburua. Norbaitek nahi balu, utziko nioke.

Popularity: 10% [?]

Berriari eta Oarsoaldeko Hitzari ez dio elkarrizketarik ematen: “Euskaldun bezala” lotsa ematen diogula esan dit gaur.

Asko dira kazetariak aguantatu behar ditugunak. Askok esan nahi izaten digute gure lana noiz eta nola egin. Gaur ere horrelako zerbait gertatu zait Joxe Joan Gonzalez Txabarri, Pasaiako Portuko Agintaritzako lehendakariarekin.

Aurretik, banekien hainbat kazetariri gaizki erantzuten diela, eta Berria egunkariari elkarrizketak ukatu dizkiola. Baina, dena den, guk, Oarsoaldeko Hitzan ere saiatu behar genuen ditxosozko elkarrizketa lortzen. Izan ere, berak aurkezten dizkigun gai gehienak baitira gure eskualdeari zuzenean eragiten diotenak. Eta atzo, gainera, Pasaiako kanpo kaia izango dena aurkeztu zuten (Oarsoaldeko Hitzan). Momentu paregabea elkarrizketa egiteko.

Gaur, berriro, berarekin topatu naiz Trintxerpeko La Herrera Iparraldea eraisten hasi baitira. “Pasaiaren birgaitzean urrats garrantzitsua izango dena”. Bertan zeuden, baita ere, Maider Ziganda Pasaiako Alkatea, Markel Olano Gipuzkoako Ahaldun Nagusia eta Arantza Tapia Mugikortasun eta Lurralde Antolamendu diputatua.

Dena ondo joan da aurkezpena egin duten bitartean. Ondoren, Gonzalez Txabarrirengana hurbildu naiz elkarrizketa eskatzera:

• Kaixo Joxe Joan. Nagore naiz, Oarsoaldeko Hitzatik. Elkarrizketa egin nahi genizuke… (ez dit bukatzen utzi).
• Gaurko Berriako titularra aldatzen duzuenean!!! Gezurra esan duzue (haserre)
• Berria gauza bat da eta Oarsoaldeko Hitza beste bat. Guk elkarrizketa egin nahi dizugu (berriro bukatu gabe).
• Zuk esango didazu niri zer den Berria eta zer Hitza!
• Bai. Berria gauza bat da eta ni Oarsoaldeko Hitzatik nator beste gauza bat egitera (berriro bukatu gabe).
• Berriako titularra aldatzen duzuenean. Euskalduna izanda, lotsa ematen dit titular horrek!!!

Eta bertan utzi nau. Benetan haserretu nau horrek. Berari gustatzen zaizkionak idazten dituenei bakarrik ematen dizkie elkarrizketak, eta gainontzekoak modu txarrean tratatzen gaitu. Bestalde, jendeak oraindik ez daki Berria eta Hitzak independenteak direla?? Gaia nola tratatu dugun ikustea besterik ez du. ‘Etxe’ berekoak gara, noski, eta batzuetan elkar elikatzen dugu, baina bakoitzaren lana independenteki egiten dugu. Ez baitira gai berak eta modu berean jorratzen informazio nazionalean (Berrian) edo lokalean (Hitzetan), batzuetan bat etorri arren.

Bai horixe, elkarrizketa nahi dugu, baina ez edozein preziotan. Gure lana ezin dute baldintzatu, noiz eta nola egin behar dugun esanez.

Ezkerrean, Joxe Joan Gonzalez Txabarri, gaurko agerraldian

Bestalde, hona hemen gaurko albistea: La Herrera Iparraldea eraisten.

Zabaldun eta Zuzeun ere argitaratu dut. Eztabaida piztu du gaiak.

Popularity: 11% [?]