Zazpigarren urtez, Udako Euskal Unibertsitateak antolatuta, Informatikari Euskaldunen Bilkura egiten ari dira Donostian, Miramonen. Bertan ez dagoenak ere zuzenean jarrai dezake bertan esaten eta gertatzen ari dena: testuz, argazkiz edo bideoz (zuzenean, zein bideo txikien bidez). Gorka Juliok (Teketenek) garatutako webgunean bilduta daude bilduta material guztiak: http://jarraipena.iebueu.org/

Bestalde, Informatikari Euskaldunen Bilkurako material guztia biltzeko #ieb09 etiketa erabiltzeko deia luzatu dute.

Herenegun, Pascual Serranoren Donostiako hitzaldira joateko aukera izan nuen. Oso hitzaldi interesgarria izan zen, bizi garen mundua ikusteko begiak irekitzeko gonbitea egin ziguna. Bizi garen mundua orokorrean, baina, bereziki, kazetaritzari dagokiona. Mota askotako interesak erdiesteko, kazetaritza nola erabiltzen den erakutsi zigun.

Komite Internazionalistak Kubako erreboluzioaren 50. urteurrenaren harira antolatutako jardunaldien baitakoa izan zen hitzaldia. Eta bertan aurkeztu zuen Serranok Conjura contra Cuba liburua. Erraz irakurtzeko liburua da, eta, bertan, hedabide handiek Kubari buruzko informazioari ematen dioten tratamendua aztertu du. Eta tratamendu hori beti da berdina: Kubaren lorpenak isilarazi eta hainbat eta hainbat topiko (gezur) zabaldu. Oinarrian, sozialismoaren kontrako jarrera zabaltzea da helburua. Izan ere, iritzi publikoa gero eta botere garrantzitsuagoa da, eta horretaz konturatuta duade hedabide handiak=enpresa=gobernuak. Iritzi publikoa bideratuta, euren nahiak/ideiak errazago zabal ditzakete. Horien artean, Kubaren kontrako jarrerak. Baina horiek guztiak, are hobeto azaltzen ditu Pascual Serranok berak.

Hemen uzten dizkizuet hitzaldiko testuak (euskaraz eta gaztelaniaz) eta audioa:

• Liburu bat, ez Kuba defendatzeko.
• Un libro, no para defender a Cuba.
• Serranoren hitzaldia.
• Galde-erantzunak.

Eskerrak eman behar dizkiot autoreari berari, berak jarri baititu gure eskura hitzaldian esandako hitzak, guk euskaratu ahal izateko. Bestalde, hona hemen, egileari buruzko informazio pixka bat:

Pascual Serrano kazetaritzan lizentziatu zen eta ABC egunkarian hasi zen lanean. Ondoren, Voces aldizkaria sortu zuen. 1996. urtean, beste autore batzuekin batera, Rebelion ataria jarri zuen abian (Interneteko agerkari “alternatiboa”). Ondo ezagutzen du berak Latinoamerika deitzen duena eta Telesur telebistan ere kolaboratu du. Horrez gain, hainbat liburu idatzi ditu. Kazetaritzari buruz, oso atal interesgarria jorratzen du hilabetero: Perlas informativas del mes… Oso abila da desinformazioa, manipulazioa eta intoxikazioa atzematen. Irakurtzeko, ikasteko eta hainbat gauzez ohartzeko oso interesgarria da, benetan.

Esan bezala, idatzi duen azkeneko liburua Conjura contra Cuba izan da. Cubainformacion atariak eta Euskadi-Cuba elkarteak editatu dute. Internet bidez eskura daiteke (Cubainformacion atarian) edo Kubarekin elkartasuna duten elkarteen bidez. Liburuari buruzko zerbait gehiago jakin nahi duenak, hemengo bideo honetan topa dezake: Serrano bere liburuari buruz.