Horri buruzko post-a egitea zen gure helburua, baina ez dugu errepikakorrak izan nahi. Beraz, honi buruz Zuzeun idazitakoa irakurtzea gomendatzen dizuegu. EITBn egin dituzten aldaketak ditu mintzagai A. Osinaldek: Nola geratuko da EITB?

Betiko legea da, greba deitzen dutenak datu batzuk ematen dituzte; eta greba jasaten dutenek beste batzuk. Baina noizbait horrelako alderik??

Greba porrota izan dela esaten ari dira Eusko Jaurlaritza, Nafarroako Gobernua, patronalak eta, noski, ondorioz, hedabideak. Inoiz baino harrigarriagoa egin zait. Hedabideak, patronalaren eta gobernuen bozeramaile gisa jokatu dute. Hori bakarrik. Baina, gainera, disimulurik gabe. Ez dira aritu itxurakerietan. Alde baten ikuspegia eman, eta lixto.

Aurten, zorionez, grebaorokorra.info izan dugu. Eta kalean ibili garenok ikusi ahal izan dugu, saldu nahi digutena baino jarraipen gehiago izan duela grebak. Beste herrietan ere hala erakutsi digute. Kalean zegoena ikusi dugu. Greba zein tokitan nabaritu den eta zeinetan ez. Argi. Zorionez, mundura ere zabaldu ahal izan dugu.

Baina gero eta gehiago da kezkatzekoa hedabideen jarrera eta jokaera. Bereziki kezkatzen ari naiz EITB etxearen jarrerarekin. Pixkanaka ari da nabaritzen Eusko Jaurlaritzaren eskua. Baina kasu honetan oso nabarmena egin zait, gehiegi. Gauza bat da alde bakarraren informazioa ematea, eta bestea ezkutatzea, manipulatzea eta desinformatzea. ETBko informatiboak ikusi zituztenek esandakoa sinistuko dute. Bakarrik. Besterik ez dakite, eta telebistak esan duenez…

Hori horrela izan ez dadin lanean jarraitu behar dugu. Jendeak izan dezala informazio guztia bere ondorioak ateratzeko. Zorionak guztiei egindako lanagatik eta grebaorokorra.info gehiago izan ditzagula!

Zentsura kasu garbia izan da, bai. Baina, zoritxarrez, horrelakorik ez da ezohikoa TVEn. Espainiako telebista kate publikoan aspalditik zentsuratzen dira albisteak eta gertaerak; Urdaci famatuaren garaian, baina baita haren aurretik eta haren ondoren ere. Gainerako telebista kateek ere zentsura praktikatzen duten bezala.

Ondorioz, zer dela-eta horrenbesteko oihartzuna hartu izanak zentsura kasu honek? Bi arrazoirengatik.

Lehenik, zentsura nabarmenegia izan dela oraingoan. Garrantzia sozial handiko gertaera batean, eta telebista pantailari begira milioika ikusle zeudela. ETBk eta TV3k, esaterako, zentsura praktikatu zuten une horretan baita ere. Baina era zuriago batean: ikusleen txistuak entzuten ziren, bai, baina txistuka ari zirenen planoak ekidin zituzten, eta, aldiz, ereserkiarekin batera eskubiko eskua bihotzera eraman zuen zale zuri-gorri baten planoa eman zuten hainbat segundoz. Zein kasualitatea, ezta?

 Baina, bestetik, zentsura kasu hau hain entzutetsua izan da horren erabilpen politiko bat egin delako. Hots, eskubiko sektore politikoekin lerrokaturiko komunikabideek era nabarmenean salatu dute gertatutakoa; eta, batzuren kasuan, bai eta gogor salatu ere. Zertarako? Espainiako Gobernuari egurra emateko; bere garaian PPri zentsura praktikatzea leporatu zitzaion bezala, PSOEk ere zentsura erabiltzen duenaren ideia txertatzeko iritzi publikoan. Hala, biharamunean, El Mundo, ABC eta La Razon egunkarien azaletan argitaratu da gaia. El Pais-ko azalean ere erreparatu diote gaiari, baina hizki txikitan, eta testu baten bukaeran. Eta kirol kazetatan, gauza bera. El Mundo-ren enpresa editorial berdinekoa den Marca egunkariak gertatutakoa gogor salatu duen bezala (azalara eramanda eta editoriala eskainita, besteak beste), Prisa taldeko As egunkariaren azalean gaiari buruzko aipurik ez.

Noski, pizturiko polemikaren sua itzaltze aldera, TVEk azkar jokatu du biharamunean, “akats” bat izan zela berrestearekin batera, Kirolak Saileko zuzendaria kargutik kenduz. Zein mezu eman nahi izan dute honen bitartez? PPrekin ez bezala, horrelako kasuen aurrean, PSOErekin arduradunen kargugabetzeak ematen direla, alegia.

Ikusiko dugu buru mozketa horretan gelditzen ote den guztia.